जळगाव, दि. ६ जुलै :
जळगाव शहरातील रामानंद पोलीस स्टेशनच्या नव्याने उभारण्यात आलेल्या सुसज्ज इमारतीचे उद्घाटन आज राज्याचे पाणीपुरवठा व जिल्ह्याचे पालकमंत्री गुलाबराव पाटील यांच्या हस्ते उत्साहात पार पडले. या प्रसंगी जिल्हाधिकारी आयुष प्रसाद, जिल्हा पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावित, सार्वजनिक बांधकाम विभागाचे कार्यकारी अभियंता आर. डी. पाटील, उपअभियंता गिरीश सूर्यवंशी यांच्यासह अनेक मान्यवर उपस्थित होते.
गेल्या अनेक वर्षांपासून भाड्याच्या इमारतीत कार्यरत असलेले हे पोलीस स्टेशन आता सुमारे ४ कोटी रुपये खर्चून अवघ्या १५ महिन्यांत बांधून पूर्ण झालेल्या आधुनिक स्वरूपाच्या इमारतीत स्थलांतरित झाले आहे. नव्या इमारतीला ‘कॉर्पोरेट लूक’ देण्यात आला असून, यामुळे पोलीस कर्मचाऱ्यांसाठी उत्तम कार्यपरिसर आणि नागरीकांसाठी आधुनिक सेवा-सुविधा उपलब्ध झाल्या आहेत.
कार्यक्रमात बोलताना पालकमंत्री गुलाबराव पाटील म्हणाले, “पोलीस दल हे कायदा आणि सुव्यवस्थेचे रक्षण करणारे प्रमुख शस्त्र आहे. त्यांना भौतिक सुविधा देणे ही शासनाची जबाबदारी आहे. जिल्हा नियोजन समितीच्या निधीतून बीट हवालदारांपासून ते वरिष्ठ अधिकाऱ्यांपर्यंत वाहनांचा पुरवठा करण्यात आला आहे. त्यामुळे गस्त, गुप्तचर यंत्रणा, आपत्कालीन परिस्थितीत तातडीची कारवाई, तसेच नागरिकांच्या मदतीसाठी पोलीस दल अधिक सक्षम व गतिमान होईल.”
या उद्घाटन सोहळ्यानंतर जिल्हा पोलीस दलासाठी नव्याने खरेदी करण्यात आलेल्या १६ जीप वाहनांचे आणि पोलीस अधीक्षकांसाठी स्वतंत्र चारचाकी वाहनाचे लोकार्पण करण्यात आले. या वाहन खरेदीसाठी २ कोटी १२ लाख रुपयांचा खर्च करण्यात आला असून, आजपासून ही वाहने जिल्ह्यातील विविध पोलीस ठाण्यांमध्ये कार्यरत झाली आहेत.
या नवीन वाहनांमुळे पोलीस यंत्रणेची गस्त व आपत्कालीन सेवा कार्यक्षमता अधिक वाढणार असून, ‘आपली पोलिस’ ही संकल्पना प्रत्येक ठिकाणी प्रभावीपणे कार्यान्वित केली जाणार आहे.
महत्त्वाचे मुद्दे:
-
१५ महिन्यांत ४ कोटी रुपये खर्चून भव्य इमारतीचे बांधकाम.
-
जिल्ह्यातील पोलिसांसाठी १६ नवीन जीप्स आणि अधीक्षकांसाठी स्वतंत्र वाहन.
-
२ कोटी १२ लाख रुपये खर्चून वाहन खरेदी.
-
पोलिसांच्या कार्यक्षमतेत वाढ, आपत्कालीन सेवांना गती मिळणार.
-
नागरिकांसाठी सुधारित सेवा-सुविधा.
