रावेरचा धडाका! 2 एकरांत 171 किलो ‘गांजा शेती’ पोलिसांनी उध्वस्त केली!

रावेर (प्रतिनिधी) –जळगाव जिल्ह्यातील रावेर तालुक्यात पोलिसांनी आज मोठी अंमली पदार्थविरोधी कारवाई करत तब्बल १७१ किलो वजनाची गांजाची शेती उध्वस्त केली आहे. ही कारवाई रावेर पोलीस स्टेशनच्या गुन्हे शोध पथकाने गुप्त माहितीच्या आधारे केली असून, १७ लाख रुपयांचा मुद्देमाल जप्त करण्यात आला आहे.

पोलीस निरीक्षक डॉ. विशाल जयस्वाल यांना दि. ९ ऑक्टोबर २०२५ रोजी गुप्त माहिती मिळाल्यानंतर सकाळी विशेष पथक तयार करण्यात आले. पोलिसांनी फॉरेन्सिक पथकासह मोरव्हाळ (ता. रावेर) येथील दुर्गम भागात सर्च ऑपरेशन राबवले.

🌿 दोन एकरांमध्ये ‘तुरीच्या पिकात’ लपवून गांजाची शेती

पोलिसांनी छापा टाकला असता, आरोपी युसुफ अकबर तडवी (वय ५०, रा. मोरव्हाळ, ता. रावेर) याने स्वतःच्या आर्थिक फायद्यासाठी तुरीच्या पिकामध्ये लपवून कॅनाबिस (गांजा) सदृश वनस्पतींची लागवड व जोपासना केल्याचे उघड झाले.

सदर शेतात तब्बल १७२ लहान-मोठी गांजाची झाडे लागवड केलेली आढळून आली. फॉरेन्सिक पथकाच्या उपस्थितीत पंचनामा करून मुद्देमाल जप्त करण्यात आला असून त्याचे अंदाजे बाजार मूल्य १७ लाख रुपये इतके आहे.

🚓 दुर्गम भागात ३ किलोमीटर परिसर पिंजून काढला

सदर शेत हे अतिशय दुर्गम भागात असल्याने गुन्हे शोध पथकाने सकाळी आठ वाजल्यापासून तीन किलोमीटर परिसर पिंजून काढत मिळालेल्या गुप्त माहितीस दुजोरा दिला आणि छापा टाकत कारवाई पार पाडली.

⚖️ आरोपीविरुद्ध एनडीपीएस अ‍ॅक्टअंतर्गत गुन्हा दाखल

या प्रकरणात आरोपी युसुफ अकबर तडवी याच्याविरुद्ध एन.डी.पी.एस. अ‍ॅक्ट अंतर्गत गुन्हा दाखल करण्याची प्रक्रिया सुरू असून, पुढील तपास सुरू आहे.

👮‍♂️ वरिष्ठ अधिकाऱ्यांच्या मार्गदर्शनाखाली अचूक नियोजन

ही कारवाई मा. डॉ. महेश्वर रेड्डी (पोलीस अधीक्षक, जळगाव),मा. श्री अशोक नखाते (अपर पोलीस अधीक्षक, जळगाव विभाग),आणि मा. श्री अनिल बडगुजर (पोलीस उपअधीक्षक, फैजपूर विभाग) यांच्या मार्गदर्शनाखाली करण्यात आली.

या कारवाईत पोलीस निरीक्षक डॉ. विशाल जयस्वाल,पो.उ.नि. तुषार पाटील, पो.उ.नि. मनोज महाजन,गुन्हे शोध पथकातील पो.ना. कल्पेश आमोदकर, पो.कॉ. प्रमोद पाटील, विशाल पाटील, श्रीकांत चव्हाण, भूषण सपकाळे, राहुल परदेशी, योगेश पाटील,पाल दुरक्षेत्राचे पो.हे.कॉ. ईश्वर चव्हाण, पो.हे.कॉ. जगदीश पाटील,पो.कॉ. इस्माईल तडवी, पो.कॉ. गजानन बोणे, कुंदन नागमल,आणि चालक पो.हे.कॉ. गोपाळ पाटील यांनी सहभाग घेतला.

🔥 जनतेचा प्रतिसाद

रावेर तालुक्यातील नागरिकांनी या कारवाईचे जोरदार स्वागत केले असून, पोलीस दलाच्या कार्यक्षमतेचे कौतुक व्यक्त केले आहे. जिल्ह्यात अंमली पदार्थविरोधी मोहिमेला या कारवाईमुळे मोठे यश मिळाले आहे.