जळगाव:शहरातील वाघ नगर परिसरात सुरू असलेल्या एका अवैध वेश्याव्यवसायाचा जळगाव पोलिसांनी पर्दाफाश केला आहे. मिळालेल्या गुप्त माहितीच्या आधारे, पोलीस उपविभागीय अधिकारी नितीन गणापुरे यांच्या नेतृत्वाखालील पथकाने ही धडक कारवाई केली. यावेळी घटनास्थळावरून तीन महिलांना ताब्यात घेण्यात आले आहे.
जळगाव शहरातील वाघ नगर भागातील एका ठिकाणी छुप्या पद्धतीने वेश्याव्यवसाय सुरू असल्याची पक्की माहिती पोलीस उपविभागीय अधिकारी नितीन गणापुरे यांना मिळाली होती. या माहितीची खातरजमा केल्यानंतर, त्यांनी एक विशेष पथक तयार करून कारवाईचे आदेश दिले.
या पथकाने वाघ नगर येथील संशयित ठिकाणी छापा टाकला. या छाप्यादरम्यान, तीन महिला आक्षेपार्ह स्थितीत आढळून आल्या. पोलिसांनी तात्काळ या तिन्ही महिलांना ताब्यात घेतले. या कारवाईमुळे परिसरात एकच खळबळ उडाली आहे.
या कारवाईत अ‍ॅन्टी ह्युमन ट्रॅफिकिंग युनिट (AHTU) च्या कर्मचाऱ्यांचाही समावेश होता. त्यामुळे, ताब्यात घेण्यात आलेल्या महिला या पीडित आहेत का, त्यांना या व्यवसायात जबरदस्तीने ढकलण्यात आले होते का, याचाही तपास पोलीस करत आहेत.
कारवाईत सहभागी पथक:
ही धडक कारवाई पोलीस उपविभागीय अधिकारी नितीन गणापुरे यांच्या मार्गदर्शनाखाली करण्यात आली. या पथकात पो/कॉ सचिन साळुंखे, अवेश शेख, अशोक फुसे, तसेच अ‍ॅन्टी ह्युमन ट्रॅफिकिंग युनिटच्या (AHTU) योगिता नारखेडे आणि मनिषा पाटील यांचा समावेश होता.
याप्रकरणी संबंधित पोलीस ठाण्यात गुन्हा दाखल करण्याची प्रक्रिया सुरू असून, या अवैध व्यवसायाचा मुख्य सूत्रधार कोण आहे आणि या रॅकेटमध्ये आणखी किती जण सामील आहेत, याचा पोलीस अधिक तपास करत तालुका पोलीस करत आहेत.
