तालुक्यातील जळगाव खुर्द गावाजवळ पुलाच्या बांधकामस्थळी भीषण अपघात झाला असून, उत्तर प्रदेशातील तिघा मजुरांचा अज्ञात वाहनाखाली चिरडून मृत्यू झाला आहे. ही घटना मंगळवारी (दि. ११ मार्च) पहाटे उघडकीस आली. या प्रकरणी पोलिसांनी तातडीने तपास सुरू करून संशयित वाहनाचा शोध घेतला आणि २३ वर्षीय तरुणाला अटक केली. या संदर्भात पोलीस अधीक्षक डॉ. महेश्वर रेड्डी यांनी पत्रकार परिषदेत माहिती दिली.
तिघांचा दुर्दैवी मृत्यू
मंगळवारी पहाटे साडेपाच वाजताच्या सुमारास झालेल्या अपघातात योगेश कुमार राजबहादुर (वय १४, रा. सीढपुरा, ता. कासगंज, जि. पटियाली, उत्तर प्रदेश), शैलेंद्रसिंग नथूसिंग राजपूत आणि भूपेंद्र मीथीलाल राजपूत (दोन्ही रा. दलेलपूर, ता. जि. विटा, उत्तर प्रदेश) यांचा जागीच मृत्यू झाला. एकाच्या डोक्यावरून, तर उर्वरित दोघांच्या अंगावरून वाहन गेल्याने त्यांचा मृत्यू झाला.
अपघाताची परिस्थिती
जळगाव खुर्द गावाजवळ नाल्यावर स्लॅब टाकण्याचे काम सुरू होते. काम संपल्यानंतर काही मजूर निघून गेले, मात्र हे तिघे मजूर रात्री तिथेच थांबले आणि झोपले. पहाटे अचानक हा दुर्दैवी अपघात घडला. सकाळी निघून ते उत्तर प्रदेशातील आपल्या गावी होळी साजरी करण्यासाठी जाणार होते, पण या अपघाताने त्यांच्या कुटुंबीयांवर दु:खाचा डोंगर कोसळला आहे.
पोलिसांची जलद कारवाई
अपघातानंतर पोलिसांनी तातडीने तपासाला गती दिली. घटनास्थळी सापडलेल्या पुराव्यांच्या मदतीने संशयित वाहनाचा शोध घेण्यात आला. सीसीटीव्ही फुटेज आणि प्रत्यक्षदर्शी नागरिकांच्या माहितीच्या आधारे संबंधित वाहन मुरुमाने भरलेले डंपर असल्याचे स्पष्ट झाले. डंपरचा क्रमांक एमएच १९ सीवाय ३१९१ असल्याचे आढळले.
तपासादरम्यान, ओरिएंट सिमेंट कंपनीच्या सीसीटीव्हीच्या मदतीने आरोपीचा ठावठिकाणा शोधण्यात आला. अखेर, नशिराबाद पोलीस ठाण्याच्या पथकाने संशयित आरोपी प्रकाश सुदामाकुमार पटेल (वय २३, रा. उफरवली, पोस्ट कोदोरा, ता. सियाबल, जि. सिंधी, मध्य प्रदेश) याला अटक केली.
पोलिसांचा महत्त्वपूर्ण सहभाग
या प्रकरणाच्या तपासात पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, उपविभागीय पोलीस अधिकारी कृष्णात पिंगळे, सहाय्यक पोलीस निरीक्षक ए.सी. मनोरे यांच्या मार्गदर्शनाखाली हेड कॉन्स्टेबल उमाकांत पाटील, प्रशांत परदेशी, जावेद शहा, राहुल वानखेडे, पोहेका अतुल लक्ष्मण महाजन यांनी महत्त्वाची भूमिका बजावली.
पोलिसांच्या तातडीच्या कारवाईमुळे आरोपीला अटक करण्यात यश आले असून, पुढील तपास सुरू आहे.
