जळगाव: एमआयडीसी पोलीस ठाण्याच्या गुन्हे शोध पथकाने 8 मार्च 2025 रोजी गोपनीय माहितीनुसार कुसुंबा परिसरातून एका इसमाला गावठी कट्ट्यासह अटक केली.
एमआयडीसी पोलीस ठाण्याचे पोलीस नाईक नितीन ठाकूर यांना गुप्त माहिती मिळाली होती की, तुषार अशोक सोनवणे (रा. खेडी आव्हाणे) हा कुसुंबा परिसरात गावठी कट्टा घेऊन फिरत आहे. त्यांनी ही माहिती पोलीस निरीक्षक संदीप पाटील यांना दिली. यानंतर पोलीस निरीक्षक पाटील यांच्या आदेशाने गुन्हे शोध पथकातील पोउपनि चंद्रकांत धनके, पोका छगन तायडे, पोका किरण पाटील, पोका राहुल घेटे यांना तातडीने कारवाईसाठी पाठवण्यात आले.
गावठी कट्ट्यासह रंगेहाथ अटक
पथकाने मिळालेल्या माहितीनुसार हॉटेल पुष्पा, नशिराबाद रोड, कुसुंबा येथे शोधमोहीम हाती घेतली. संशयित तुषार सोनवणे हा हळदी रंगाचा शर्ट घालून मोटारसायकलवर बसलेला असल्याचे दिसले. पोलिसांनी त्याच्याकडे जाताच तो पळून जाण्याचा प्रयत्न करू लागला. मात्र, पोलिसांनी तत्काळ पाठलाग करून त्याला पकडले.
तपासणी दरम्यान मिळाले शस्त्र
पोलिसांनी पंचासमक्ष त्याची अंगझडती घेतली असता त्याच्याकडे एक गावठी कट्टा (किंमत: ₹20,000/-) आणि दोन जिवंत काडतुसे (किंमत: ₹2,000/-) मिळून आली. तसेच त्याच्या ताब्यातील होंडा शाईन मोटारसायकल (किंमत: ₹50,000/-) जप्त करण्यात आली.
गुन्हा दाखल, पुढील तपास सुरू
सदर प्रकरणी पोलीस नाईक नितीन ठाकूर यांच्या फिर्यादीवरून गुन्हा रजि. नं. 147/2025 अंतर्गत आर्म्स अॅक्ट 3/25 नुसार गुन्हा दाखल करण्यात आला आहे. या गुन्ह्याचा तपास पोउपनि चंद्रकांत धनके व पोना योगेश बारी करीत आहेत.
वरिष्ठ अधिकाऱ्यांचे मार्गदर्शन
ही कारवाई मा. पोलीस अधीक्षक महेश्वर रेड्डी, मा. अपर पोलीस अधीक्षक अशोक नखाते, मा. उपविभागीय पोलीस अधिकारी संदीप गावीत यांच्या मार्गदर्शनाखाली पार पडली.
(जळगाव जिल्ह्यातील वाढत्या गुन्हेगारीला आळा घालण्यासाठी पोलिसांकडून कठोर कारवाई सुरू असून, अवैध शस्त्र बाळगणाऱ्या व्यक्तींवर पोलिसांची करडी नजर राहणार आहे.)
