जळगाव प्रतिनिधी | श्री मराठी न्यूज जळगाव जिल्ह्यात गेल्या काही महिन्यांपासून मोटारसायकल व सायकल चोरीच्या घटनांमध्ये वाढ झाल्यामुळे पोलीस यंत्रणा सतर्क झाली असून, या संदर्भात मोठी आणि महत्त्वाची कारवाई करत स्थानिक गुन्हे शाखा (LCB), जळगावच्या पथकाने मोटारसायकल चोरीचा बनाव उघडकीस आणून तीन आरोपींना अटक केली आहे.
या प्रकरणात संशयित आरोपींनी एका फायनान्स कंपनीची फसवणूक करण्याच्या उद्देशाने मुद्दाम मोटारसायकल चोरीची बनावट तक्रार दाखल केल्याचे उघड झाले असून, हे प्रकरण धक्कादायक आहे.
📌 पोलिस अधीक्षकांचे निर्देश व एलसीबीची कारवाई
जिल्ह्यात मोटारसायकल चोरीचे प्रमाण वाढल्याने मा. डॉ. महेश्वर रेड्डी (पोलीस अधीक्षक, जळगाव), मा. श्री. अशोक नखाते (अपर पोलीस अधीक्षक, जळगाव) यांच्या आदेशावरून व श्री. संदीप पाटील (वरिष्ठ पोलीस निरीक्षक, स्थानिक गुन्हे शाखा, जळगाव) यांच्या मार्गदर्शनाखाली तपासाला गती देण्यात आली.
दि. २४ जून २०२५ रोजी अशोक हिरामण मोरे (रा. दगडी मनवेल, ता. यावल) याच्याकडे संशयास्पद मोटारसायकल असल्याची माहिती पोलीस निरीक्षक संदीप पाटील यांना मिळाली. त्यांनी त्यांच्या पथकातील अधिकारी व अंमलदार — पो.हे.का. प्रितमकुमार पाटील, पो.हे.का. यशवंत टहाकळे, पो.का. बबन पाटील, पो.का. प्रदीप सपकाळे — यांना त्वरित कारवाईचे आदेश दिले.
🕵️♂️ चौकशी दरम्यान उघड झाला चोरीचा बनाव
पोलिसांनी अशोक मोरे यास ताब्यात घेत व त्याच्याकडील बजाज कंपनीची मोटारसायकल क्र. MH 19/CC 6640 ची चौकशी केली असता धक्कादायक माहिती समोर आली.
मोरे याने सांगितले की, सुमारे ५ वर्षांपूर्वी त्याने प्रमोद निलेश कोळी (रा. भुसावळ) यांच्या मोटारसायकलचा सौदा जफर शेख उस्मान (एजंट, भुसावळ) याच्या माध्यमातून १६,००० रुपयांना केला होता. एजंटने त्याच्याकडून २,००० रुपये कमिशन घेतले होते. ही मोटारसायकल बजाज फायनान्सकडून कर्जावर घेतलेली असून त्याचे हप्ते बाकी होते.
यात पुढे उघडकीस आले की, कर्ज थकित असल्यामुळे फायनान्स कंपनीपासून वाचण्यासाठी संबंधितांनी बनावट चोरीची तक्रार दाखल करून पोलिसांची दिशाभूल केली होती. प्रमोद कोळी याने दि. ३०/१२/२०१९ रोजी भुसावळ शहर पोलीस स्टेशनला सीसीटीएनएस क्र. २८५/२०१९ नुसार कलम ३७९ भा.दं.वि. अन्वये गुन्हा दाखल केला होता.
🚓 आरोपी जेरबंद – मोटारसायकल जप्त
या संपूर्ण बनावामध्ये गुंतलेले आरोपी खालीलप्रमाणे:
-
अशोक हिरामण मोरे (वय ३९, रा. दगडी मनवेल, ता. यावल)
-
जफर शेख उस्मान (वय ३४, मूळ रा. रावेर, सध्या जाम मोहल्ला, भुसावळ)
-
प्रमोद निलेश कोळी (वय ३७, रा. हुडको कॉलनी, भुसावळ)
सदर आरोपींना ताब्यात घेऊन त्यांच्याकडील मोटारसायकल जप्त करण्यात आली आहे. पुढील कारवाईसाठी सर्व आरोपींना भुसावळ शहर पोलीस स्टेशनच्या ताब्यात देण्यात आले आहे.
💬 पोलिसांचे कौतुक – एलसीबीचा तपास अतिशय अचूक
सदर कारवाई मा. डॉ. महेश्वर रेड्डी (पोलीस अधीक्षक, जळगाव), मा. श्री. अशोक नखाते (अपर पोलीस अधीक्षक, जळगाव) आणि मा. श्री. संदीप पाटील (वरिष्ठ पोलीस निरीक्षक, स्थानिक गुन्हे शाखा, जळगाव) यांच्या मार्गदर्शनाखाली पोलीस हवालदार प्रितमकुमार पिताबर पाटील, पोलीस हवालदार यशवंत लक्ष्मण टहाकळे, पोलीस कॉन्स्टेबल बबन सखाराम पाटील व पोलीस कॉन्स्टेबल प्रदीप जनार्दन सपकाळे यांनी केली.
