जळगाव – जिल्ह्यात वाढत्या मोटारसायकल चोरीच्या घटनांवर आळा घालण्यासाठी एमआयडीसी पोलिसांनी मोठी कारवाई करत दोन दुचाकी हस्तगत केल्या आहेत. पोलीस निरीक्षक संदीप पाटील यांच्या मार्गदर्शनाखाली गुन्हे शोधपथकाने कसून तपास करून दोन वाहनचोरांना अटक केली.
बाबा नगर येथून बुलेट चोरी
हर्षद दिलीपकुमार नाकपाल यांच्या मालकीची रॉयल इम्पॅक्ट 350 (MH-19 CH-4898) ही पांढऱ्या रंगाची बुलेट 13 नोव्हेंबर 2024 रोजी रात्री सिंधी कॉलनी, बाबा नगर येथून चोरीला गेली होती. यासंदर्भात एमआयडीसी पोलीस ठाण्यात गुन्हा नोंदवण्यात आला होता.
सीसीटीव्ही आणि गोपनीय माहितीच्या आधारे आरोपींना अटक
गुन्हे शोधपथकाने सीसीटीव्ही फुटेज आणि गुप्त माहितीच्या आधारे संशयित (1) जावेद शेख चांद (रा. मास्टर कॉलनी, जळगाव) आणि (2) अदनान अमजद खान (रा. शाहूनगर, जळगाव) यांना 22 फेब्रुवारी 2025 रोजी ताब्यात घेतले. तपासादरम्यान, आरोपींनी चोरीची कबुली दिली.
दुसरी बुलेटही हस्तगत
पोलिसी कसून चौकशीत आरोपी जावेद शेख याने मास्टर कॉलनी परिसरातून आणखी एक काळ्या रंगाची बुलेट चोरी केल्याची कबुली दिली. त्यामुळे पोलिसांनी ती बुलेटही हस्तगत केली. एकूण ₹1,30,000 किंमतीच्या दोन बुलेट पोलिसांनी जप्त केल्या आहेत.
वरिष्ठ अधिकाऱ्यांचे मार्गदर्शन व पोलिसांची कामगिरी
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावीत यांच्या मार्गदर्शनाखाली करण्यात आली. पोलीस निरीक्षक संदीप पाटील, उपनिरीक्षक राहुल तायडे, चंद्रकांत धनके, तसेच गुन्हे शोधपथकातील योगेश बारी, विकास सातदीवे, नाना तायडे, किरण पाटील, राहुल घेटे आदींनी महत्त्वाची भूमिका बजावली.
तपास सुरूच, आणखी गुन्हे उघडकीस येण्याची शक्यता
संशयितांकडून अधिक माहिती मिळवण्यासाठी पोलीस तपास सुरू आहे. या टोळीने आणखी किती गाड्या चोरी केल्या, याचा शोध घेतला जात आहे.
