लोणेरे (जि. रायगड) प्रतिनिधी — राज्यातील मान्यताप्राप्त आणि प्रतिष्ठित समजल्या जाणाऱ्या डॉ. बाबासाहेब आंबेडकर तंत्रविद्यानिकेतन विद्यापीठ, लोणेरे येथे एक धक्कादायक आर्थिक घोटाळा उघडकीस आला आहे. या प्रकरणात विद्यापीठात कंत्राटी पद्धतीने कार्यरत असलेल्या लिपिकाने तब्बल १६ लाख ३८ हजार ५०० रुपयांचा अपहार केला आहे. आरोपीचे नाव सुमित अनिल जाधव असे असून, पोलिसांनी त्याला अटक केली आहे. या घटनेमुळे संपूर्ण शैक्षणिक वर्तुळात खळबळ उडाली आहे.
नेमकं काय घडलं? विद्यापीठाच्या सह्याद्री वसतिगृहात कंत्राटी लिपिक म्हणून कार्यरत असलेल्या सुमित जाधव याने १२८ विद्यार्थ्यांकडून त्यांच्या शिष्यवृत्ती, फी आणि इतर खर्चांच्या नावाखाली रक्कम गोळा केली. विशेष म्हणजे त्याने ही सर्व रक्कम स्वतःच्या Google Pay खात्यावर जमा करून घेतली.
या प्रकारात एकूण १५ लाख ७८ हजार ५०० रुपये गोळा करून, त्याचा वैयक्तिक वापरासाठी गैरवापर करण्यात आला. इतकेच नाही, तर काही विद्यार्थ्यांना धमकावल्याचाही आरोप तक्रारीत करण्यात आला आहे. यावरून विद्यार्थ्यांमध्ये भीतीचे वातावरण निर्माण झाले होते.
अधिकृत चेकमध्ये फेरफार करूनही अपहार फसवणुकीचा प्रकार एवढ्यावरच थांबलेला नाही. पोलिस तपासात असेही उघड झाले की, विद्यापीठाच्या अधिकृत चेक (क्रमांक ८२१८७६) मध्ये फेरफार करून ६०,००० रुपयांचा अपहार करण्यात आला. मूळ रक्कम ६८९० रुपये असताना, त्यात छेडछाड करून ती ६६,८९० रुपये इतकी दाखवण्यात आली आणि ती रक्कम आरोपीने स्वतःच्या खात्यात वळवली.
तक्रार कोणाकडून व केव्हा? या गंभीर आर्थिक गैरव्यवहाराची तक्रार गुजरातमधील सुरत येथे राहणाऱ्या प्रतीककुमार पुरानी (CA) यांनी १७ जुलै २०२५ रोजी रात्री ९:४६ वाजता गोरेगाव पोलीस ठाण्यात दाखल केली. ही तक्रार दाखल होताच, फक्त दोन तासांत, म्हणजे रात्री ११:३९ वाजता आरोपीला अटक करण्यात आली.
गुन्हेगारी कलमांखाली कारवाई सुमित जाधव याच्यावर IPC कलम ३२६(५), ३१८(२), ३१८(४), ३३८(२), ३५१(२) अंतर्गत गुन्हा दाखल करण्यात आला आहे. २१ जुलैपर्यंत पोलिस कोठडी सुनावण्यात आली होती. त्यानंतर त्याला न्यायालयीन कोठडीत रवानगी करण्यात आली आहे.
विद्यापीठ प्रशासनाच्या कार्यशैलीवर गंभीर प्रश्नचिन्ह या संपूर्ण प्रकरणामुळे डॉ. बाबासाहेब आंबेडकर तंत्रविद्यानिकेतन विद्यापीठाच्या प्रशासकीय कार्यपद्धतीवर गंभीर प्रश्नचिन्ह उपस्थित झाले आहे. कंत्राटी पद्धतीने नेमले जाणारे कर्मचारी कोणत्या पद्धतीने विद्यार्थ्यांची फसवणूक करू शकतात, याचा गंभीर प्रत्यय या प्रकरणातून आला आहे.
पुढील तपास सुरु गोरेगाव पोलीस स्टेशन व संबंधित यंत्रणा या प्रकरणाचा पुढील तपास करत आहेत. आरोपीने याआधीही अशाच प्रकारचे अपहार केले आहेत का, याचाही शोध घेण्यात येत आहे. विद्यार्थ्यांचे आर्थिक नुकसान भरून मिळावे, अशी मागणी आता पालक व शिक्षण प्रेमी करत आहेत.
