पाचोरा │ प्रतिनिधी पाचोरा शहरातील बसस्थानकात भरदिवसा युवकाची गोळ्या झाडून निर्घृण हत्या झाल्यानंतर संपूर्ण तालुक्यात खळबळ उडाली होती. या घटनेनंतर पोलिस प्रशासनाच्या कार्यक्षमतेवर प्रश्नचिन्ह उपस्थित झाले होते. परिणामी, पाचोरा पोलिस ठाण्याचे निरीक्षक अशोक कचरु पवार यांची तडकाफडकी बदली करत त्यांना नियंत्रण कक्षात पाठवण्यात आले आहे. त्यांच्या जागी चाळीसगाव ग्रामीणचे प्रभारी पोलिस निरीक्षक राहुलकुमार पवार यांच्याकडे पाचोरा शहराची धुरा सोपवण्यात आली आहे.
बसस्थानकात थरारक हत्या
४ जुलै रोजी पाचोरा बसस्थानक परिसरात आकाश मोरे या २५ वर्षीय युवकावर भरदिवसा गोळ्या झाडण्यात आल्या. गजबजलेल्या परिसरात झालेल्या या घटनेमुळे नागरिकांमध्ये भीतीचे वातावरण निर्माण झाले. पोलिसांपुढे कायदा-सुव्यवस्थेचा मोठा प्रश्न निर्माण झाला.
पोलिस अधीक्षकांनी घेतला तातडीने निर्णय
पाचोरा पोलिस ठाण्याबाबत मागील काही महिन्यांपासून तक्रारी वाढत असतानाच ही धक्कादायक घटना घडल्याने जिल्हा पोलिस अधीक्षक डॉ. महेश्वर रेड्डी यांनी तातडीने निर्णय घेतला. त्यांनी पाचोरा पोलिस निरीक्षक अशोक पवार यांना हटवून त्यांची बदली नियंत्रण कक्षात केली.
नवा चेहरा: राहुलकुमार पवार
चाळीसगाव ग्रामीणचे प्रभारी पोलिस निरीक्षक राहुलकुमार पवार यांची पाचोरा शहरासाठी नवी नियुक्ती करण्यात आली आहे. शनिवारी रात्री त्यांनी पदभार स्वीकारताच कामकाजाला सुरुवात केली. पवार हे अत्यंत अनुभवी अधिकारी असून त्यांनी जळगाव जिल्ह्यासह इतर जिल्ह्यांतही प्रभावी सेवा दिली आहे. त्यांच्या आगमनाने पाचोरा शहरात पुन्हा कायदा-सुव्यवस्थेला गती मिळेल, असा विश्वास व्यक्त होत आहे.
कायदा-सुव्यस्थेला सर्वोच्च प्राधान्य
नवीन पोलिस निरीक्षक राहुलकुमार पवार यांनी स्पष्ट केलं की, “शहराच्या कायदा-सुव्यस्थेला सर्वोच्च प्राधान्य देणार असून सर्वसामान्य नागरिकांच्या तक्रारी तत्काळ मार्गी लावण्यात येतील. कोणतीही गैरकृत्ये सहन केली जाणार नाहीत.”
नागरिकांतून समाधान व्यक्त
या बदलामुळे पाचोरा शहरातील नागरिकांतून समाधान व्यक्त होत असून, शहरात पुन्हा शांतता व सुरक्षितता प्रस्थापित होईल, अशी अपेक्षा व्यक्त होत आहे.
➡️ आता पुढील काही दिवसांत पाचोऱ्यातील कायदा-सुव्यस्थेचा कस लागणार आहे. राहुलकुमार पवार यांच्यासारख्या अनुभवी अधिकाऱ्यांमुळे शहरात सकारात्मक बदल होण्याची शक्यता आहे.
