अमळनेर, जळगाव | 16 जुलै 2025 — अमळनेर शहरात काल रात्री एका मोठ्या कारवाईत अमळनेर पोलिसांनी सुमारे 3 लाख रुपये किमतीचा 15 किलो गांजा आणि 40 हजारांची मोटरसायकल जप्त केली आहे. या कारवाईत दोन आरोपींना अटक करण्यात आली असून त्यांच्या विरोधात एनडीपीएस कायदा 1985 अंतर्गत गुन्हा दाखल करण्यात आला आहे.
15 जुलै 2025 रोजी रात्री अमळनेर पोलीस ठाण्याचे पोलिस नाईक अमोल पाटील हे गस्त घालत असताना, त्यांना खात्रीलायक गुप्त बातमी मिळाली की जळोद गावाहून अमळनेर शहरात गांजाची विक्री करण्यासाठी दोन इसम येणार आहेत. तात्काळ वरिष्ठ पोलीस अधिकाऱ्यांच्या मार्गदर्शनाखाली पोलीस निरीक्षक दत्तात्रय निकम यांच्या नेतृत्वाखाली छापा टाकण्यात आला.
रात्री २२.१० वाजता जळोद गावाजवळ, एक काळ्या रंगाची बजाज प्लॅटीना मोटरसायकल (क्र. MH19-CT-4845) येताना दिसली. पोलिसांनी तात्काळ अडवून झडती घेतली असता, एका पांढऱ्या गोणीतून 15 किलो 40 ग्रॅम वजनाचा गांजा सापडला.
अटक आरोपींची माहिती:
-
महेश कैलास पाटील, वय 21, रा. जडे गल्ली, भडगाव
-
नितीन शरद गौड (मसराम), वय 19, रा. गौंडबस्ती, पाचोरा
दोघांच्याही ताब्यातून 3 लाख रुपये किमतीचा गांजा व 40 हजारांची मोटरसायकल असा एकूण 3.40 लाखांचा मुद्देमाल जप्त करण्यात आला. दोघांविरोधात गुन्हा र.क्र. 286/2025 प्रमाणे एनडीपीएस कायदा 1985 चे कलम 8, 20, 22, 3(5) अंतर्गत गुन्हा दाखल करण्यात आला आहे.
👮 कारवाईत सहभागी अधिकारी व कर्मचारी:
ही यशस्वी कारवाई पोलीस अधीक्षक महेश्वर रेड्डी, अप्पर पोलीस अधीक्षक कविता नेरकर, उपविभागीय पोलीस अधिकारी विनायक कोते यांच्या मार्गदर्शनाखाली करण्यात आली. कारवाईत पुढील अधिकारी व कर्मचारी सहभागी होते:
-
पो.नि. दत्तात्रय निकम
-
सपोनि रविंद्र पिंगळे, सुनिल लोखंडे
-
पोकों अमोल पाटील, जितेंद्र निकुंभे, प्रशांत पाटील, संतोष नांगरे, समाधान सोनवणे आदी
या प्रकरणाचा पुढील तपास सपोनि सुनिल लोखंडे करत आहेत.
🌿 गांजाविरोधातील कठोर कारवाई: पोलीस दल सतर्क
या कारवाईमुळे अमळनेर परिसरात अवैध नशेच्या व्यापारावर आळा घालण्याचे पोलिसांचे प्रयत्न पुन्हा अधोरेखित झाले आहेत. नागरिकांनी अशा प्रकारची कोणतीही माहिती असल्यास पोलीस नियंत्रण कक्षाला तत्काळ माहिती द्यावी, असे आवाहन पोलिसांकडून करण्यात आले आहे.
