जळगाव, दि. ३० – समाजाचा चौथा स्तंभ म्हणून ओळखल्या जाणाऱ्या पत्रकारांना सतत कार्यरत राहावे लागते. पाऊस, ऊन, वारा, थंडी यांची तमा न बाळगता दिवसरात्र धावपळ करणाऱ्या पत्रकारांसाठी त्यांच्या मनोरंजनासोबतच सुसंवाद वाढवण्यासाठी आणि जिल्ह्यातील सर्व माध्यमांच्या पत्रकारांना एकत्र करण्याच्या उद्देशाने ‘पत्रकार प्रीमियर लीग’चे आयोजन करण्यात आले आहे. राज्यात प्रथमच जळगाव शहरात हा अनोखा उपक्रम राबविण्यात येणार असून १० ते १२ फेब्रुवारीदरम्यान शिवतीर्थ मैदानावर ही स्पर्धा रंगणार आहे.
पत्रकार परिषदेत माहिती जाहीर
गुरुवार, दि. ३० रोजी या स्पर्धेबाबत माहिती देण्यासाठी पत्रकार परिषद आयोजित करण्यात आली होती. यावेळी आयोजक वाल्मिक जोशी, किशोर पाटील, चेतन वाणी, वसीम खान, सचिन गोसावी, जकी अहमद आदी उपस्थित होते. त्यांनी दिलेल्या माहितीनुसार, पत्रकार प्रीमियर लीग ही पत्रकारांच्या मनोरंजनासाठी आणि कल्याणासाठी राबविण्यात येणारा एक महत्त्वाचा उपक्रम आहे. या स्पर्धेमुळे जिल्ह्यातील पत्रकारांना एकत्र येऊन खेळण्याची संधी मिळेल, तसेच सुसंवाद, सहकार्य आणि मैत्री वृद्धिंगत होईल.
स्पर्धेत २४ संघांचा सहभाग
या स्पर्धेत जिल्ह्यातील विविध तालुक्यातील पत्रकारांचे १४ संघ, जळगाव शहरातील पत्रकारांचे ५ संघ, संपादकांचा एक संघ असे २० पत्रकार संघ असतील. याशिवाय, लोकप्रतिनिधी, जिल्हाधिकारी कार्यालय, जिल्हा परिषद आणि पोलीस प्रशासन असे ४ शासकीय संघ सहभागी होणार आहेत. त्यामुळे एकूण २४ संघ स्पर्धेत भाग घेणार आहेत.
स्पर्धेची वैशिष्ट्ये
प्रत्येक संघात १३ खेळाडूंचा समावेश असेल.
प्रत्येक सामना ८ षटकांचा असेल आणि टेनिस बॉलवर खेळवला जाईल.
खेळाडूंना कोणतेही शुल्क आकारले जाणार नाही.
स्पर्धेच्या समारोप सोहळ्यात विजेत्यांना ट्रॉफीसह हजारो रुपयांची बक्षिसे दिली जाणार आहेत.
पत्रकारांनी सहकार्य करावे – आयोजकांचे आवाहन
ही स्पर्धा पत्रकारांसाठी पत्रकारांनीच आयोजित केलेली असल्याने सर्व पत्रकारांनी सहकार्य करावे, असे आवाहन आयोजकांनी केले आहे. स्पर्धेसाठी तालुक्यांतून संघांची नावे मागवण्यात आली असून मोठ्या संख्येने पत्रकारांनी यात सहभाग नोंदवावा, अशी अपेक्षा व्यक्त करण्यात आली आहे.या
अनोख्या उपक्रमामुळे पत्रकारांमध्ये नवीन ऊर्जा संचारेल आणि परस्परांमधील मैत्री वृद्धिंगत होईल, असा विश्वास आयोजकांनी व्यक्त केला आहे.
